Na Kena i Lakolako
Na porokaramu vou ni vuli cakacaka e na vanua ni cakacaka ka yacana na Modern Apprenticeships Programme, e sa umana vata na veika vinaka e na i lakolako makawa ni vuli cakacaka e na vanua ni cakacaka, kei na so na i walewale vou.
E tauyavutaki na i lakolako vou ni vuli e na vanua ni cakacaka me vakarawarawataka vei ira na i taukei ni cakacaka na nodra vakacakacakataki ira na gone ulu vinaka kei na nodra vakavulici e na cakacaka.
E 32 na mataqali mata-cakacaka era vuli cakacaka tiko kina na gone e na gauna oqo – na vuli e na kena i lakolako vou kei na kena i lakolako makawa – me rawa kina ni ra rawata na i ka 3 kei na i ka 4 ni i vakatagedegede ni Sitivikiti ni Vanua Raraba (National Certificate).
E sega ni vinakati me ra dinau me saumi kina na nodra vuli me rawa ni ra rawata na nodra sitivikiti – era na saumi tiko e na gauna ni nodra vuli cakacaka. E kena i kuri na nodra tokoni mai vua na vakailesilesi (Modern Apprenticeships Co-ordinator) e qarava vakatabakidua na kena cicivaki na i lakolako vou ni vuli e na vanua ni cakacaka, ka vakarawarawataka vakalevu sara vei ira era vuli cakacaka kei ira na i taukei ni cakacaka.
Na i matai ni ka me caka kevaka e gadrevi na curu e na i lakolako vou ni vuli e na vanua ni cakacaka (Modern Apprenticeship), sa i koya na veitaratara kei na vakailesilesi e qarava vakatabakidua na mataqali vuli vakaoqo. E na veivuke ko koya e na kena digitaki na mataqali vuli cakacaka me veiganiti vinaka duadua, e na kena vakarautaki na veidinadinati me baleta na i lakolako vou ni vuli cakacaka e na vanua ni cakacaka – ka veitokoni tiko e na loma ni 2 ki na 4 na yabaki ni cakacaka kei na vuli me yacova ni sa rawa na sitivikiti e na i lakolako vou ni vuli oqo.
E raba i levu sara mai na cakacaka wale ga na i lakolako vou ni vuli oqo e na vanua ni cakacaka – e solia vei ira na gone na i tauyavu ni dua na cakacaka vou. E rawa ni ra goleva vakatabakidua e dua na i wasewase ni mataqali cakacaka era cakava ko ira era rawata na sitivikiti ni i lakolako vou ni vuli oqo. E rawa tale ga ni ra vakuria na nodra kila ka vakacakacaka, ka taura na mataqali cakacaka vou era na sota kaya.